विराटनगर २८ भदौ,: नेपाली कांग्रेसको कोशी प्रदेश सरकारमा सहभागिता सुरु भएको छ। कांग्रेसबाट तीन मन्त्री र एक राज्यमन्त्रीले आज शपथ ग्रहण गरेका छन्।
प्रदेश महामन्त्रीसमेत रहेका प्रदेश सभा सदस्य भुपेन्द्र राईको नेतृत्वमा कांग्रेस सरकारमा सहभागी भएको हो। कृष्णप्रसाद सिटौला समूहका राई भौतिक पूर्वाधार मन्त्री नियुक्त भएका छन् भने सिटौला पक्षकै भूमि राजवंशी भौतिक पूर्वाधार राज्यमन्त्री बनेका छन्। यसैगरी, खगेनसिंह हाङ्गाम उद्योग, कृषि तथा सहकारी मन्त्री र सदानन्द मण्डल पर्यटन, वन तथा वातावरण मन्त्री बनेका छन्। हाङ्गाम शेरबहादुर देउवा समूहका सदस्य हुन् भने मण्डल संस्थापन भित्रकै ज्ञानेन्द्र कार्की निकट मानिन्छन्।
गत साउन १२ मा सरकारमा सहभागी हुने निर्णय गरेको कांग्रेस कोइराला समूहका २ मन्त्रीको अडानका कारण सरकारमा सहभागी हुन सकेको थिएन। आज शेखर कोइराला समूह विना कांग्रेस सरकारमा सहभागी भएको हो। कोशीमा शेखर कोइराला पक्षले २ वटा मन्त्रालयको माग गरेको थियो, जबकि संस्थापन पक्षले एउटा मन्त्री र एउटा राज्यमन्त्री दिने निर्णय गरेको थियो। कांग्रेसबाट थप एक मन्त्री र एक राज्यमन्त्री केही दिनपछि सरकारमा सहभागी हुने जानकारी प्राप्त भएको छ।
