बुटवल : पूर्वपश्चिम राजमार्ग अन्तर्गत पूर्वी नवलपरासीको दाउन्नेमा सडक भासिदा राजमार्ग पूर्ण रूपमा अवरुद्ध भएको छ। बर्दघाट नगरपालिका–४ दाउन्ने जंगल स्थित खुर्सानीखोलामा सडक भासिएपछि सवारी आवागमन ठप्प भएको जिल्ला प्रहरी कार्यालय नवलपरासीका सूचना अधिकारी डीएसपी रेशम बोहोराले जानकारी दिएका छन्।
सडकको माथिल्लो भागमा रहेको पर्खाल भत्किएपछि विद्युत हाइटेन्सन लाइन पनि सडकमा ढलेको थियो। पोल हटाउने प्रयास गर्दागर्दै सडक भासिएपछि यो समस्या उत्पन्न भएको हो। सोमबार साँझ ५ बजेपछि राजमार्ग खोल्ने प्रयास भइरहेपनि तत्काल सम्भव नभएको प्रहरीले जनाएको छ।
सडक डेढ फिट भासिएको र बाँकी भाग पनि चर्किएको कारण मर्मतका लागि सडक डिभिजन कार्यालय चितवन र विद्युत प्राधिकरणसँग समन्वय भइरहेको छ। सडक अवरुद्ध भएपछि नारायणगढबाट आउँदै गरेका सवारी साधनलाई दुम्कीबास र बुटवलतर्फबाट जाँदै गरेका सवारी साधनलाई बर्दघाटमा रोकिएको छ।
