बैतडी जिल्लामा भन्सार छली गरेर भारतबाट ल्याइएका अवैध सामग्री बरामद गरिएको छ। दशरथचन्द नगरपालिका–१० अदरपिण्डस्थित गोठलापानी–झुलाघाट सडकखण्डमा शुक्रबार साँझ जिल्ला प्रहरी कार्यालयबाट खटिएको गस्ती टोलीले यी सामग्री फेला पारेको हो।
प्रहरी निरीक्षक बलराम पाण्डेयका अनुसार २५ हजार १ सय ५७ रुपैयाँ बराबरको चिनी, मिश्री, खानेतेल, बिडी, सुर्ती लगायतका बेवारिसे सामग्री बरामद गरिएको छ। बरामद गरिएको सामग्रीलाई आवश्यक कानुनी कारवाहीका लागि महाकाली भन्सार कार्यालय, झुलाघाटमा बुझाइने जानकारी दिएका छन्।
