नेपाली क्रिकेट टोलीले क्यानडामा अभ्यास खेल खेल्ने, लिग–२ र टी–२० सिरिजको तयारी
२८ भदौ, काठमाडौं। नेपाली क्रिकेट टोलीले आईसीसी विश्वकप लिग–२ त्रिकोणात्मक सिरिजको तयारीमा क्यानडामा एक अभ्यास खेल खेल्ने पक्का भएको छ। नेपाल क्रिकेट संघ (क्यान) का अनुसार, नेपाली टोलीले क्यानडा डेभलपमेन्ट टोलीसँग उक्त अभ्यास खेल खेल्नेछ। खेल शनिबार राती ७:४५ बजे हुनेछ र क्यानडा टोलीमा नपरेका अन्य उत्कृष्ट खेलाडीहरू यस खेलमा सहभागी हुनेछन्।
नेपाली टोली मंगलबार राती क्यानडा पुगेको थियो। लिग–२ मा नेपाल, क्यानडा र ओमानबीच प्रतिस्पर्धा हुनेछ। नेपालले पहिलो खेल १६ सेप्टेम्बरमा क्यानडासँग खेल्नेछ। त्यसपछि १८ सेप्टेम्बरमा ओमान, २२ सेप्टेम्बरमा पुनः क्यानडा र २४ सेप्टेम्बरमा ओमानसँग खेल्ने तालिका छ।
त्रिकोणात्मक टी–२० आई सिरिजको पनि आयोजना हुनेछ। नेपालले २८ सेप्टेम्बरमा क्यानडा, २९ सेप्टेम्बरमा ओमान, १ अक्टोबरमा क्यानडा र २ अक्टोबरमा ओमानसँग खेल्नेछ। क्यानको वार्षिक क्यालेन्डर अनुसार सेप्टेम्बरमा क्यानडासँग दुई ओडीआई खेलको सिरिज खेल्ने योजना छ, तर हालसम्म उक्त सिरिजको बारेमा अन्तिम निर्णय भएको छैन।
अमेरिका र स्कटल्यान्डसँगको लिग–२ खेलको लागि नेपाल अर्को महिना प्रेरिरी भ्यू ह्युस्टनमा हुनेछ। नेपालले २७ अक्टोबरमा अमेरिकासँग, २९ अक्टोबरमा स्कटल्यान्डसँग, र २ नोभेम्बरमा अमेरिकासँग खेल्नेछ। त्यसपछि यी तीन टोलीबीच टी–२० सिरिज पनि हुनेछ।
२०२६ डिसेम्बरसम्म चल्ने लिग–२ मा नेपाल ४ खेलमा १ जितसहित सातौं स्थानमा छ। आठ टोलीको लिग–२ मा शीर्ष चार टोलीले सोझै एकदिवसीय विश्वकप छनोट खेल्न पाउनेछन्, जबकि शीर्ष चारमा पर्न नसक्ने टोलीहरूले प्लेअफ खेल्नुपर्नेछ।
