नेपालका तीव्र गतिका बलर करण केसी, गुल्सन झा र स्पिनर सन्दीप लामिछानेले अन्तर्राष्ट्रिय क्रिकेट परिषद् (आइसीसी) को नयाँ ओडीआई वरीयतामा सुधार गरेका छन्।
तर, केही प्रमुख ओपनर खेलाडीहरूको वरीयता भने खस्किएको छ। ओडीआईमा ब्याटिङतर्फ आसिफ शेख ११ स्थान तल झर्दै ७९ औं स्थानमा पुगेका छन् भने कुशल भुर्तेल ४ स्थान तल झर्दा ८० औं स्थानमा छन्। रोहित पौडेल भने ८७ औं स्थानमा यथावत छन्।
ओडीआईको अलराउन्डरतर्फ, सन्दीप लामिछानेले एकै पटक २२ स्थान सुधार गर्दै ४१ औं स्थानमा पुगेका छन्, जसमा उनको अंक ट्रविस हेड र एडम जाम्पासँग समान १४७ छ। बलिङतर्फ भने उनी ४८ औं स्थानमा यथावत छन्। ललित राजवंशी ५२ औं स्थानमा खस्किएका छन् भने दीपेन्द्रसिंह ऐरी ६४ औं स्थानमा एक स्थान खस्किएका छन्।
अलराउन्डर करण केसीले ११ स्थान सुधार गर्दै ७६ औं स्थानमा उक्लिएका छन्। गुल्सन झाले १३ स्थान सुधार गर्दै ९० औं स्थानमा पुगेका छन्, र ललित राजवंशीले १ स्थान सुधार गरेर ९४ औं स्थानमा छन्।
