त्रिभुवन राजपथ हुँदै पालुङबाट वीरगञ्ज गइरहेको ना ७ ख १७७१ नम्बरको तेल ट्यांकरमा ३९२ किलो लागूऔषध गाँजा भेटिएको छ। आज मंगलबार बिहान सवा ३ बजे हेटौंडा उपमहानगरपालिका-१५, रातोमाटेमा रहेको पूर्व-पश्चिम सडक खण्डमा प्रहरीले यो तस्करीको घटनालाई पत्ता लगाएको हो।
मकवानपुरका प्रहरी नायव उपरीक्षक श्यामु अर्यालका अनुसार, प्रहरीले ट्यांकर चालक २६ वर्षीय रोशन पुरी र सहचालक २२ वर्षीय धनबहादुर मल्ललाई पक्राउ गरेका छन्। दुबै जनाको घर मकवानपुरको मनहरी गाउँपालिका-९, ज्यामिरेमा रहेको छ।
प्रहरीले ट्यांकरको तीन नम्बरको डिब्बामा २५ वटा पोका बनाएर गाँजा राखिएको अवस्थामा फेला पारेको जनाएको छ। मकवानपुरबाट भारततर्फ गाँजाको तस्करी भइरहेकाे र जिल्लाका विकट क्षेत्रमा गाँजा उत्पादन हुने क्रम जारी रहेको प्रहरीको भनाइ छ।
प्रहरीले हरेक वर्ष गाँजा खेती नष्ट गर्ने अभियान चलाए पनि यसको उत्पादन र ओसारपसारमा कमी आएको पाइँदैन। यस घटनाले नेपालमा लागूऔषध तस्करी र यसको नियन्त्रणमा थप चुनौती रहेको जनाउँछ।
