काठमाडौं : बाढीपहिरोका कारण अवरुद्ध भएका राजमार्गहरू दशैंको अवसरमा खोल्नका लागि सरकारले नेपाली सेना सहितका प्राविधिक टोलीलाई संलग्न गराएर अध्ययन सुरु गरेको छ। बीपी राजमार्गको कम्तिमा १० देखि १२ किलोमिटर खण्डमा वैकल्पिक व्यवस्थापन गर्नको लागि भौतिक पूर्वाधार तथा यातायात मन्त्रालय र सेनाका प्राविधिकहरू मिलेर निरीक्षण गर्दैछन्।
बुधबार भौतिक पूर्वाधार मन्त्रालयका सचिव केशवकुमार शर्माको नेतृत्वमा चार जना प्राविधिकको टोलीले सेनाको हेलिकोप्टरमार्फत प्रभावित स्थानको निरीक्षण गरेको थियो। स्रोतका अनुसार, वैकल्पिक मार्ग बनाउनका लागि विष्फोटक पदार्थको प्रयोग गर्नुपर्ने हुनसक्ने भएकाले सेनालाई पनि संलग्न गरिएको छ।
रक्षामन्त्री मानविर राई र भौतिक पूर्वाधार तथा यातायात मन्त्री देवेन्द्र दाहालबीचको छलफलमा मन्त्री दाहालले भकुन्डेबेंसीदेखि १० देखि १२ किलोमिटर सडक मर्मतमा प्राविधिक पठाउन कठिनाइ भएको कुरा व्यक्त गरे। उनले सेनाको हेलिकोप्टरको माग गर्दै प्रभावित क्षेत्रका लागि आवश्यक सहयोगको आवश्यकता बताए।
यातायात मन्त्री दाहालसँगको भेटपछि रक्षामन्त्री राईले प्रधानसेनापति अशोकराज सिग्देलसँग सडक मर्मतको विषयमा छलफल गरेका थिए। सेनाको सानो हेलिकोप्टर प्रयोग गरेर स्थलगत अध्ययन पनि गरिएको थियो। रक्षामन्त्री राईले भौतिक पूर्वाधार मन्त्रालयको नेतृत्वमा सडक खुलाउने सम्भाव्यता अध्ययन भइरहेको जानकारी दिए।
नेपाली सेनाले विभिन्न सडक निर्माणका कार्यहरूमा सक्रिय भूमिका निभाइरहेको छ, जसमा काठमाडौं–तराई/मधेश द्रुतमार्ग, दार्चुला–तिंकर र कर्णाली करिडोरका परियोजनाहरू समावेश छन्। हालैको भारी वर्षाका कारण पृथ्वी राजमार्ग र बीपी राजमार्गमा क्षति पुगेको छ, जसले गर्दा सयौं यात्रु अवरुद्ध भएका छन्।
