नेपालका १४ जिल्लाका स्थानीय तहलाई विपद संकटग्रस्त घोषणा गर्न सिफारिस
काठमाडौं : राष्ट्रिय विपद जोखिम न्युनिकरण तथा व्यवस्थापन प्राधिकरणको कार्यकारी समितिले बाढी, पहिरो र डुवानबाट बढी प्रभावित विभिन्न जिल्लाका स्थानीय तहलाई विपद संकटग्रस्त घोषणा गर्न सिफारिस गरेको छ।
गृहमन्त्री रमेश लेखकको नेतृत्वमा भएको बैठकले १४ जिल्लाका विभिन्न पालिकालाई संकटग्रस्त घोषणा गर्न सरकारलाई सिफारिस गरेको हो। सम्भवत: शुक्रबार नै बस्ने मन्त्रिपरिषद बैठकले कार्यकारी समितिको सिफारिस अनुसार विपद प्रभावित स्थानीय तहलाई संकटग्रस्त क्षेत्र घोषणा गर्ने तयारी गरेको प्राधिकरणका स्रोतले जानकारी दिएको छ।
सिफारिस गरिएका जिल्लामा पाँचथर, ओखलढुंगा, उदयपुर, सर्लाही, रौतहट, सिन्धुली, मकवानपुर, चितवन, ललितपुर, सिन्धुपाल्चोक, धादिङ, दोलखा, रामेछाप र काभ्रे रहेका छन्। यी स्थानीय तहलाई तीन महिनाका लागि संकटग्रस्त क्षेत्रको रुपमा घोषणा गर्ने तयारी गरिएको छ।
