सहकारी ठगी आरोपमा पक्राउ परेका पूर्वगृहमन्त्री र राष्ट्रिय स्वतन्त्र पार्टीका सभापति रवि लामिछानेलाई अनुसन्धानका लागि ६ दिनको म्याद थप गरिएको छ। जिल्ला अदालत कास्कीका सूचना अधिकारी सुरज अधिकारीका अनुसार, म्यादको गणना पक्राउ परेको दिन, अर्थात् शुक्रबारदेखि सुरू हुनेछ।
अदालतले दिएको अनुमति अनुसार, प्रहरीले लामिछानेलाई बुधबार अपराह्नसम्म थुनामा राखेर अनुसन्धान गर्न पाउनेछ। यदि अनुसन्धानको प्रगति विवरणसहित थुनाअवधि लम्ब्याउनु परे, अदालतबाट पुन: म्याद थपको अनुमति लिनु पर्नेछ।
लामिछानेलाई पोखराको सूर्यदर्शन सहकारी रकम अपचलन प्रकरणमा पक्राउ गरिएको हो। उनलाई शुक्रबार काठमाडौंको वनस्थलीस्थित पार्टी केन्द्रीय कार्यालयबाट पक्राउ गरिएर सोही राति पोखरा पुर्याइएको थियो। शनिबार सार्वजनिक बिदा परेकोले आज मात्रै उनलाई अदालतमा पेश गरिएको हो।
अदालतमा पेश हुनुअघि पोखराको सहिदचोकमा लामो संख्यामा पार्टी कार्यकर्ता जम्मा भएका थिए, भने राष्ट्रबैंक चोकमा सहकारी पीडितहरूको पनि भीड थियो। जिल्ला प्रशासन कार्यालयले संभावित स्थिति नियन्त्रणमा राख्न सहिदचोक आसपासका क्षेत्रमा अनिश्चितकालीन निषेधाज्ञा जारी गरेको थियो। निषेधाज्ञा तोडेर नाराबाजी गर्ने क्रममा प्रहरीले प्रदर्शनकारीमाथि पानीको फोहोरा र अश्रुग्यास प्रहार गरेको थियो।
