सुर्खेतमा पिकनिकबाट फर्किँदै गरेको गाडी दुर्घटना, २७ जना घाइते
सुर्खेतमा पिकनिकबाट फर्किँदै गरेको गाडी दुर्घटनामा परि २७ जना घाइते भएका छन्। बुधबार साँझ करिब ६:३५ बजे रामघाटबाट कटकुवा पिकनिक खाएर फर्कँदै गरेका यात्रु सवार गाडी दुर्घटनामा परेको हो। कर्णाली प्रदेश ०२–०१ख ०१८८ नम्बरको फोर्स गाडी वीरेन्द्रनगर नगरपालिका–७ कपासेमा रहेको श्री कालीबहादुर गणको मुख्य गेटनजिकको मोडमा अनियन्त्रित भई सडकबाट करिब १०० मिटर तल खसेको थियो, जसबाट २७ जना यात्रु घाइते भएका छन्।
घटनास्थलमै उद्धारका लागि श्री कालीबहादुर गणका सेनानी कौशल कार्कीको नेतृत्वमा श्री नं. ४ फि ए गुल्मका डाक्टर सचित थापाको टोली खटिएको थियो। सेनाको टोलीले तत्कालै घाइतेहरूको उद्धार गरी उपचारका लागि कर्णाली प्रदेश अस्पताल पुर्याएको छ।
अस्पतालमा अहिले सेनाका स्वास्थ्यकर्मीहरूले घाइतेहरूको उपचारमा सक्रिय रूपमा सहयोग गरिरहेका छन्। दुर्घटनाबाट भएको क्षतिको पूर्ण विवरण आउन बाँकी रहेको श्री उत्तर पश्चिम पृतना हे.क्वा. निमारे ब्यारेकका सूचना अधिकारी मेजर रेनु शाहले जानकारी दिइन्।
