बैतडीको प्रसिद्ध मेलौली भगवती मन्दिरमा ‘देहीजात’ मेला कात्तिक २९ र ३० गते
बैतडी जिल्लाको मेलौली नगरपालिका–१ मा अवस्थित ऐतिहासिक मेलौली भगवती मन्दिरमा यस वर्ष पनि कात्तिक २९ र ३० गते ‘देहीजात’ मेला आयोजना गरिने भएको छ। यो मन्दिरमा हरेक वर्ष कार्तिक शुक्ल चतुर्दशी र पूर्णिमाका दिन ‘देहीजात’ नामक जात्रा लाग्ने परम्परा रहँदै आएको छ। धार्मिक र सांस्कृतिक दृष्टिकोणले महत्वपूर्ण मानिने यो मेला स्थानीय तथा छिमेकी क्षेत्रका जनताको आस्थाको केन्द्र बनेको छ।
मेलौली धार्मिक सेवा समितिका अध्यक्ष जगदीश सिंह नायकका अनुसार, यो मेलामा विशेष रूपमा बोका र राँगाको बलि दिइन्छ। मेलौली भगवतीको विशेष पूजा र बलिप्रदानको परम्पराले गर्दा यो जात्राले विशेष धार्मिक महत्त्व पाएको छ। प्रत्येक वर्ष झैँ यस वर्ष पनि यो मेलामा सुदूरपश्चिम प्रदेशका विभिन्न जिल्लाहरूका साथै कर्णाली प्रदेश र छिमेकी देश भारतबाट समेत हजारौँ श्रद्धालु भक्तजनहरू मन्दिरमा पुगी पूजाआजा र देवीको दर्शन गर्ने अपेक्षा गरिएको छ।
मेलौली भगवती मन्दिर, बैतडी जिल्लाको ऐतिहासिक तथा पौराणिक स्थलका रूपमा प्रख्यात छ। यो मन्दिरले हिन्दू धर्मालम्बीहरूको आस्था र विश्वासलाई जोडेर राखेको छ। विशेष गरेर कार्तिक महिनाको शुक्ल पक्षमा लाग्ने यो मेला नजिकिँदै गर्दा, मन्दिर तथा वरपरका क्षेत्रमा सरसफाइ र सजावटको काम तीव्र रूपमा अगाडि बढाइएको छ।
स्थानीय प्रशासनले पनि मेलामा सुरक्षा व्यवस्थापनलाई ध्यानमा राख्दै पर्यटक र श्रद्धालुको सहजताका लागि विशेष सुरक्षा तथा सहयोग व्यवस्था मिलाएको छ। मेला अवधिभर कानून र शान्ति सुव्यवस्था कायम राख्नका लागि स्थानीय सुरक्षाकर्मी तथा स्वयंसेवकहरूको व्यापक परिचालन गरिने योजना बनाइएको छ।
यस धार्मिक पर्वले स्थानीय व्यापार र पर्यटनलाई पनि सहयोग पुर्याउँदै आएको छ। मेला हेर्न आउने श्रद्धालुहरूले यहाँको स्थानिय बजारमा किनमेल तथा अन्य सामग्रीहरूको खरिद गर्ने हुँदा व्यापारमा वृद्धि भएको पाइन्छ। यो मेलाले नजिकका स्थानमा रहेका अतिथि गृह तथा होटल व्यवसायमा पनि सकारात्मक प्रभाव पार्ने विश्वास गरिएको छ।
अध्यक्ष नायकका अनुसार, मेलौली भगवतीको देहीजात मेलाले धार्मिक आस्थाका साथै समाजमा मेलमिलाप, सद्भाव र एकताको भावना प्रवर्द्धन गर्न सघाउँछ। धार्मिक स्थलहरूप्रति आकर्षण र आस्थाका कारण श्रद्धालुहरूको संख्या प्रत्येक वर्ष बढ्दै गएको छ।
मेलौली भगवती मन्दिरमा लाग्ने यो जात्रालाई परम्परा, संस्कृति र धार्मिक आस्थाको धरोहरका रूपमा लिइन्छ। यस वर्षको ‘देहीजात’ मा पनि बृहत् श्रद्धालुको उपस्थिति हुने अपेक्षा गरिएको छ।
