स्ट्यान्डअप कमेडी रियालिटी शो ‘कमेडी च्याम्पियन’मा टप ४ मा स्थान बनाएका उदयमान कमेडियन हिक्मत महराको मृत्यु भएको छ। उनी कञ्चनपुरको शुक्लाफाँटा नगरपालिका-११, कलुवापुरका ३० वर्षीय युवक हुन्।
महरा कैलालीको गोदावरी नगरपालिका-४ मा मोटरसाइकल दुर्घटनामा परेका थिए। जिल्ला प्रहरी कार्यालय कैलालीका अनुसार, सवारी दुर्घटनामा सु.प.प्र.०१–००१ क २०६० नम्बरको रोकेर राखिएको ट्रक देखेर महराले चलाएको म २ प ९११७ नम्बरको मोटरसाइकलमा एक्कासी ब्रेक लगाएका कारण मोटरसाइकल पल्टिएको थियो।
गम्भीर घाइते भएका महरालाई सेती प्रादेशिक अस्पतालमा उपचारका लागि लगिएको थियो। प्रहरीले दिएको जानकारी अनुसार, उपचारको क्रममा मंगलबार राति महराको मृत्यु भएको हो।
मोटरसाइकल दुर्घटनामा संलग्न ट्रक चालक धनगढी उपमहानगरपालिका-४, बोराडाडीका ५४ वर्षीय नन्दसिंह बोहरा प्रहरीको नियन्त्रणमा रहेका छन्।
हिक्मत महराको मृत्युले नेपाली मनोरञ्जन क्षेत्रमा ठूलो क्षति पुगेको छ। उनको मृत्युपछि परिवार, साथी, र प्रशंसकले उनलाई श्रद्धासुमन अर्पण गर्दै सामाजिक सञ्जालमा संवेदना व्यक्त गरिरहेका छन्।
