डोटीको विपीनगरमा ड्युटीमै बेहोस भएका प्रहरी सहायक हवलदारको निधन

डोटी, ८ जनवरी – डोटीको विपीनगरमा ड्युटी गर्ने क्रममा एक प्रहरी सहायक हवलदारको निधन भएको छ। इलाका प्रहरी कार्यलय विपीनगरमा कार्यरत प्रहरी सहायक हवलदार बहादुर सिंह पालीको निधन भएको हो।

डडेल्धुराको भागेश्वर गाउँपालिका–५ का पाली आज बिहान ३ बजेदेखि ६ बजेसम्मको कार्यालय ड्युटीमा रहेका थिए। ड्युटीको दौरान अचानक उनको छाती दुख्न थालेपछि उनी बेहोस भए। तत्काल स्थानिय विपीनगर पोलिक्लिनकमा उपचारका लागि पुर्याइएको भए पनि स्थिति सुधारिन सकेन। त्यसपछि उनलाई सेती प्रादेशिक अस्पताल, धनगढी पठाइएको थियो, जहाँ चिकित्सकले उनलाई मृत घोषणा गरे।

पालीको निधनले प्रहरी समुदायमा शोकको लहर फैलिएको छ। उनका सहकर्मीहरूले उनलाई श्रद्धाञ्जली अर्पण गरेका छन्।