गृहमन्त्री रमेश लेखकलाई सांसद थपलियाको कडा प्रश्न- तपाईं दलित विरोधी हो?
सिरहामा महायज्ञका लागि दलितको घर भत्काइएको विषयले प्रतिनिधिसभा बैठकमा प्रवेश पाएको छ। बिहीबारको बैठकमा सांसदहरूले महायज्ञ स्थलमा दलित दीपक मलिक डोमको घर भत्काइएको विषयमा चर्को प्रतिक्रिया जनाएका हुन्।
सिरहाको औरही गाउँपालिका-५ का दीपक मलिकको घर १७ चैतदेखि आयोजना गर्न लागिएको श्री १०८ विष्णु महायज्ञ स्थलमा भत्काइएको हो। महायज्ञको आयोजनाका क्रममा अछूत डोम समुदायको घर राख्न नहुने भन्ने भनाइ बजरंगी बाबाले व्यक्त गरेका थिए, जसको आधारमा पालिका अध्यक्ष शिवजी यादवले दीपक मलिकको घर भत्काउन आदेश दिएका थिए।
यस विषयमा सांसद सम्झना थपलियाले सरकारको मौनताप्रति असन्तोष व्यक्त गर्दै गृहमन्त्रीसँग प्रश्न गरेकी छिन्, “तपाईं दलित विरोधी हो? यसरी संघीय लोकतान्त्रिक गणतन्त्रको जग बलियो हुन्छ?” उनले गृहमन्त्रीलाई संसदमा जवाफ दिन आग्रह गरेकी छिन्।
महायज्ञको स्थानमा अछुत डोम समुदायका दीपक र उनका परिवारलाई ५ सय मिटर टाढा एकान्त स्थानमा अस्थायी घरमा सारिदिएको छ। यस घटनाले सामाजिक असमानता र मानव अधिकारको उल्लङ्घनको गम्भीर विषयलाई उजागर गरेको छ।
