सेती अस्पतालमा मिर्गौला पीडित बिरामीको तेस्रो तलाबाट हामफाल्दा मृत्यु
धनगढी — सेती प्रादेशिक अस्पतालमा उपचाररत एक मिर्गौला पीडित बिरामीले अस्पतालको तेस्रो तलाबाट हामफाल्दा ज्यान गुमाएका छन्।
कैलालीको गोदावरी नगरपालिका–१ निवासी ६३ वर्षीय चक्रबहादुर सिंहले मंगलबार दिउँसो अस्पतालको भवनबाट हामफालेका थिए। घटनास्थलमै गम्भीर घाइते भएका उनलाई तुरुन्तै आकस्मिक कक्षमा पुर्याइएको भए पनि चिकित्सकले मृत घोषणा गरेका हुन्।
प्रादेशिक अस्पतालका सूचना अधिकारी किशोर श्रेष्ठका अनुसार सिंह सोमबार मात्र डायलासिसका लागि अस्पताल आएका थिए र चिकित्सकको सल्लाहमा मेडिकल वार्डमा भर्ना भएका थिए। उनको श्रीमती ईश्वरीदेवी कुरुवाका रूपमा अस्पतालमै थिइन्।
मंगलबार दिउँसो २ बजेपछि एकछिन बाहिर जान्छु भन्दै निस्किएका सिंहले केही बेरमै तेस्रो तलाबाट हामफालेको अस्पताल प्रशासनले जनाएको छ। आत्महत्याको कारण भने खुल्न बाँकी रहेको छ र घटनाबारे थप अनुसन्धान भइरहेको प्रहरीले जानकारी दिएको छ। यस घटनाले दीर्घरोगी तथा मानसिक रूपमा दबावमा परेका बिरामीहरूको मानसिक स्वास्थ्यप्रति राज्यको ध्यान आवश्यक रहेको सन्देश दिएको छ।
