भाटभटेनी सुपरमार्केटका सुरक्षा गार्ड कृष्णप्रसाद पराजुली सम्मानित
राजावादीको आन्दोलनका क्रममा भएको लुटपाटका दौरान बहादुरीका साथ प्रतिकार गर्ने भाटभटेनी सुपरमार्केटका सुरक्षा गार्ड कृष्णप्रसाद पराजुलीलाई सम्मानित गरिएको छ। बुधवार, भाटभटेनी सुपरमार्केटमा आयोजित एक विशेष समारोहमा भाटभटेनीका अध्यक्ष मीनबहादुर गुरुङले ५ लाख १ हजार १११ रुपैयाँ चेक हस्तान्तरण गर्दै पराजुलीलाई पुरस्कारसहित सम्मान गरे।
यस अवसरमा, भाटभटेनीले अर्का एक सुरक्षा गार्डलाई ५१ हजार रुपैयाँको पुरस्कार प्रदान गरेको थियो। त्यस्तै, ड्युटीमा खटिएका अन्य दुई जनालाई पनि २५ हजारका दरले सम्मान गरिएको छ।
सुपरमार्केटको सिइओ राजु पौडेलले भने, “सुरक्षामा खटिएका कर्मचारी र व्यापारलाई निरन्तरता दिन र रातभर मर्मत सम्भारमा लागेका कर्मचारीहरुको मनोबल उच्च बनाउन यस प्रकारको सम्मान गरिएको हो।”
उक्त लुटपाटका क्रममा करिब ८० लाख रुपैयाँ बराबरको क्षति भएको जानकारी दिइएको छ। कम्पनीका अनुसार, ६४ लाख ८८ हजार रुपैयाँ बराबरको सामान लुटिएको थियो।
सुरक्षा गार्ड कृष्णप्रसाद पराजुलीको बहादुरीले न केवल भाटभटेनीका कर्मचारीहरूको हिम्मत बढाएको छ, बरु यस घटनाले सम्पूर्ण समुदायमा बल र साहसको उदाहरण प्रस्तुत गरेको छ।
