पश्चिम नवलपरासीको सुनवल नगरपालिका–६ पुलटोलमा रहेको पोखरीमा डुबेर दुई दाजुभाइको ज्यान गएको छ। इलाका प्रहरी कार्यालय सुनवलका अनुसार विष्णु कुँवरका १० वर्षीय छोरा विप्सन कुँवर र ८ वर्षीय छोरा दिप्सन कुँवरको डुबेर मृत्यु भएको हो।
शुक्रबार साँझ एक बालक पोखरीमा डुबेको जानकारी आएपछि स्थानीय र प्रहरी टोली खोजीमा खटिएका थिए। खोजीको क्रममा दुवै बालकको शव पोखरीमै तैरिएको अवस्थामा फेला परेको इन्स्पेक्टर सन्तोष पौडेलले जानकारी दिए।
मृतक बालकहरू स्थानीय जनसेवा माध्यमिक विद्यालयमा क्रमशः कक्षा ४ र कक्षा २ मा अध्ययनरत थिए। उनीहरू पौडी खेल्न गएका बेला डुबेको हुन सक्ने प्रारम्भिक अनुसन्धानबाट खुलेको प्रहरीले जनाएको छ।
यो घटनाले स्थानीयवासीलाई मर्माहत बनाएको छ। सुरक्षा उपायको अभाव र बालबालिकाको निगरानीको कमीले यस्तो दुखद घटना भएको भन्दै स्थानीयले पोखरी वरपरको सुरक्षामा ध्यान दिन आग्रह गरेका छन्।
