काठमाडौं — काठमाडौँ महानगरपालिकाको आर्थिक वर्ष २०८१/८२ को बजेट आज (असार १० गते) सार्वजनिक नहुने भएको छ। कानुनअनुसार यही मितिभित्र बजेट प्रस्तुत गर्नुपर्ने बाध्यकारी प्रावधान हुँदाहुँदै पनि काठमाडौँमा बजेट नआउने भएको हो।
बजेट सार्वजनिक गर्नुअघि अनिवार्य रूपमा बस्नुपर्ने कार्यपालिका बैठक अहिलेसम्म बस्न सकेको छैन। मेयर बालेन्द्र शाह (बालेन) र प्रमुख प्रशासकीय अधिकृत सरोज गुरागाईंबीच बढ्दो द्वन्द्वका कारण कार्यपालिका बैठक अन्योलमा परेको हो।
मेयर शाहको सचिवालयका एक सदस्यका अनुसार बजेटबारे छलफल गर्न कार्यपालिका तथा नगरसभा बैठक बोलाउने तयारी भइरहे पनि आजका लागि कुनै बैठक तय गरिएको छैन। आजका लागि बैठक बोलाइएको छैन ती सदस्यले बताए तर कार्यपालिका र नगरसभा बोलाउने तयारीमा आन्तरिक छलफल भइरहेको छ।
गत पुस १४ गतेयता महानगरको नगरसभा बैठक पनि बस्न सकेको छैन। यसबीचमा कार्यपालिका सदस्यहरूले पटक–पटक बजेट माग गर्दै आएका छन्। शहरी विकास तथा नागरिक सेवामा राजधानीको मुख्य जिम्मेवारी बोकेको काठमाडौँ महानगरपालिकामा बजेट नआउनु प्रशासनिक समन्वय अभाव र राजनीतिक द्वन्द्वको गम्भीर संकेतका रूपमा हेरिएको छ। यसले सेवा प्रवाहमा थप जटिलता आउने सम्भावना बढेको छ।
