सिरहामा छुवाछूतको जघन्य घटना महायज्ञको नाममा दलित परिवारको घर भत्काइयो
सिरहाको औरही गाउँपालिकामा आगामी श्री श्री १०८ विष्णु महायज्ञको तयारीमा अछुत डोम समुदायका दीपक मरिक (डोम) को घर स्थानीय प्रशासनको जेसिभी प्रयोग गरी भत्काइएको छ। महायज्ञ आयोजक महात्यागी बजरंगी बाबाले मरिकको घर हटाउन आदेश दिएका थिए, जसको आधारमा गाउँपालिका अध्यक्ष शिवजी यादवले उक्त घर भत्काउने निर्णय गरे।
मरिक परिवारको घर मात्र भत्काइएको छैन, उक्त स्थानको दुई फिट माटो समेत खनेर हटाइएको छ। विगत ३० वर्षदेखि बसोबास गर्दै आएको मरिक परिवारलाई पालिकाले पाँच वर्ष अघि जनता आवास कार्यक्रमअन्तर्गत दुई कोठे पक्की भवन निर्माण गरी दिएको थियो। घर भत्काइएपछि मरिक परिवारलाई सुन्दर जनता माध्यमिक विद्यालयको दुई धुर जग्गामा एक फुसको घरमा राखिएको छ।
मरिक परिवारको पीडित सदस्य अनिता मरिकले गाउँपालिका अध्यक्ष र पूर्ववडाध्यक्षबाट महायज्ञको नाममा घर हटाउन दबाब दिएको बताइन्। उनका अनुसार, “हाम्रो घरमा हाम्रा बालबच्चाको नाभी जोडिएको थियो, हाम्रो भावनात्मक सम्बन्ध थियो, तर हामीलाई अन्यायपूर्वक उठिबास गरियो।”
नयाँ स्थानमा बसोबास थालेपछि मरिक परिवारलाई थप समस्याको सामना गर्नुपरेको छ, जसमध्ये खानेपानीको अभाव, बिजुली नहुँदा र गर्मीमा सर्पको डर प्रमुख समस्याका रूपमा छन्।
सार्वजनिक असन्तुष्टिको बीच, राष्ट्रिय दलित आयोगका पूर्वसदस्य कवुली पासवानले यस घटनालाई छुवाछूतको जघन्य अपराधको रूपमा मूल्यांकन गर्दै दोषीहरूको कानुनी कारबाहीको माग गरेका छन्। उनले राष्ट्रिय मानव अधिकार आयोग र राष्ट्रिय दलित आयोगलाई घटनाको निष्पक्ष छानबिन गर्न आग्रह गरेका छन्।
