काठमाडौं — आईसीसी विश्वकप लिग २ का लागि क्यानडा भ्रमणमा रहेका नेपाली टोलीले आज ओमानसँग प्रतिस्पर्धा गर्दैछ।
खेल नेपाली समयअनुसार किंग्स सिटी मैदानमा राति पौने ९ बजेदेखि सुरु हुनेछ। क्यानडा भ्रमणका क्रममा लगातार तीन खेलमा पराजित भएको नेपालले आजको खेल जितेर श्रृंखलाको सुखद अन्त्य गर्ने प्रयास गर्दैछ।
नेपालले पहिलो खेलमा क्यानडासँग ठूलो अन्तरले हार व्यहोर्यो। दोस्रो खेलमा ओमानसँग एक विकेटले पराजित भएको थियो भने तेस्रो खेलमा क्यानडासँग ५ विकेटले पराजित भयो।
यो ओडीआई सिरिजपछि नेपालले क्यानडा र ओमानसँग टी-२० सिरिज पनि खेल्नेछ। त्यसपछि नेपालले क्यानडा वा ए टोलीसँग दुई एकदिवसीय अभ्यास खेल खेल्ने सम्भावना छ।
सिरिज सकेपछि नेपाल लिग २ का लागि अमेरिका जानेछ, जहाँ अमेरिका, नेपाल र स्कटल्यान्डबीच त्रिकोणात्मक र टी-२० आई दुवै सिरिज हुनेछ।
