चितवनमा महिला हत्याका आरोपमा ६२ वर्षीय टीकाराम रानाभाट पक्राउ

चितवन — महिला हत्याको आरोपमा चितवन प्रहरीले ६२ वर्षीय टीकाराम रानाभाटलाई पक्राउ गरेका छन्। टीकारामले ७१ वर्षकी विष्णुमाया रानाभाटको हत्या गरेको आरोप लागेको छ। टीकाराम विष्णुमायाका ज्वाइँ हुन्।

चितवन जिल्ला प्रहरी कार्यालयका प्रवक्ता डिएसपी भेषराज रिजालका अनुसार, विष्णुमाया असाेज १९ गतेदेखि हराएकी थिइन्। खोजतलास गर्दा, उनको शव २१ गते घर नजिकको परूई सामुदायिक वनमा भेटिएको थियो।

पक्राउ गरिएका टीकारामको घरबाट प्रहरीले खुर्पा र सुनका विभिन्न रिङहरू समेत बरामद गरेका छन्। प्रारम्भिक अनुसन्धानका अनुसार, टीकारामले विष्णुमायाको हत्या गरेर शवलाई भीरमा फालेका हुन्। घटना भएको समयमा टीकारामले लगाएका कपडाहरू पनि प्रहरीले फेला पारेको बताइएको छ। अनुसन्धान जारी छ।