झापाको अर्जुनधारा नगरपालिका–३, दार्जिलिङ डाँडामा एक व्यक्तिले सामान्य विवादका क्रममा आफ्नै श्रीमती ३७ वर्षीया मुना चौहानको हत्या गरेका छन्। जिल्ला प्रहरी कार्यालय, झापाका डीएसपी कृष्णकुमार चन्दका अनुसार, सोमबार अपराह्न पौने ४ बजेतिर वीरबहादुर चौहानले श्रीमतीसँग विवाद हुँदा उनलाई फलामको दाउले घाँटीमा प्रहार गरेका थिए।
उक्त घटनामा मुना चौहानको घटनास्थलमै मृत्यु भएको थियो। वीरबहादुर चौहान हत्या पछि फरार भएका थिए।
प्रहरीले उनी भागेको सूचना पाउने वित्तिकै खोजीमा जुटेको थियो। जिल्ला प्रहरी कार्यालय र इलाका प्रहरी कार्यालय, अनारमनीको टोलीले सक्रियता देखाउँदै वीरबहादुरलाई अर्जुनधारा नगरपालिकाकै जुकेखाडी जंगलमा लुकेर बसेको अवस्थामा हतियारसहित नियन्त्रणमा लिएका हुन्।
डीएसपी चन्दले घटनाको अनुसन्धान जारी रहेको र पक्राउ परेका वीरबहादुरलाई आवश्यक कारवाहीका लागि उचित प्रक्रिया अघि बढाइने जानकारी दिएका छन्। यस घटनाले स्थानीयमा गम्भीर चासो र चिन्ता उत्पन्न गरेको छ।
